top of page

ONSE JESCHICHT

2007

Gott jeef ne kjliene Grupp von Frind en Velangen em Hoat, eene mootje, oppe Bibel-jejrinde, Läwen-jäwende Kjoakj enne Cuauhtemoc Jäajent auntofangen. Met dit em Senn, hilt dee Grupp äare ieeschte Mietinj, om dee Mäajlichkjeit derchtoräden ne niee Kjoakj auntofangen. Dee Grupp Frind funk aun sikj jieda Wäakj to trafen, toom lieren, plonen un fa Leidunk to bäden. Ut dit kjeem dee Aunfank von Lebenswasser Kjoakj.

2008

LW entscheid sikj dee Städ bie Km 23.5 to kjeepen, wua see to dee Tiet toopkjeemen.

2009 - 2013

Derch dise Joaren worden dee Sindach Zemorjes Gottesdeensten volstendja derchjedocht. En besondret Jewicht wort jelajcht opp onse ieejne Leeda schriewen un aunfangen dee eksistierende Leeda en Plautdietsch to äwasaten. Ons Jugent Deenst wort jeformt.

2014

Prädja Steve Wall wort dee Väasetta von dän Elder Rot, un hee brocht fresche Vision un Rechtunk no de Kjoakj. Een nieet deepet Velangen Gott Sien Wellen to sieekjen un to befoljen dreef dee Kjoakj en eene Tiet von Waussen un kloare Vision nenn.

2015

Prädja John Wall kjeem no Lebenswasser aus en Unjarechten/Prädjen Prädja, un hee brukt siene Gow von kloaret, praktischet Unjarechten fa de Kjoakj.

2017

Prädja Steve Wall wort dee Leidenda Prädja un funk aun dee Kjoakj voltiedich to deenen.

2018

Aunhoolendet Waussen leid no dän tweeda Sindach Zemorjes Gottesdeenst auntofangen.

2019

Prädja Steve Wall storf en een Äarplän Ojjlekj. Unja siene Leidaschoft woss dee Kjoakj butajeweenlich. Hee wia en Dreema, en Veropp Plona un haud ne onjleefliche Passion dee Plautdietsch rädende Mennoniten rome Welt fa Jesus to errieekjen. Hee wia dee Häafiera von Live streaming un dän Online Deenst enne Kjoakj nenbrinjen. Derch onsen Deenst aun Youtube, Facebook, un dän LW App, es dee goode Norecht äwa 2.5 Million mol jejkikjt, derch dee Tiet waut hee de Kjoakj leid.

Prädja Steve wia uk en Leeda Dichta un Aunbädungs Leida bie Lebenswasser. Hee leid daut Tiem, Leeda to äwasaten un opptoschnaken en Plautdietsch, dee rutjejäft woaren unja LW Aunbädunk. Dee äwasade Aunbädungs Leeda woaren gaunz äwa Nuad un Sied Amerika jespält un jebrukt en Kjoakjen Gottesdeensten.

Prädja Steve un siene Fru, Debbie hauden 4 Kjinja, Caleb, Brianna, Matthew un Kylee.

Prädja Steve, endäm daut hee tru wia to sien Roop von Gott, haft tiendusende Menschen gaunz rome Welt beenflust un siene Leidaschoft woat wieda to feelen sennen bie Lebenswasser un noch tiendusende mea aunspornen!

2020

Prädja Jacob Kornelsen kjrieech dän Roop, LW wieda to leiden. Hee neem dee Veauntwuatunk aus Leidenda Prädja aun, nodäm daut hee seit 2019 aus Väasetta en dän Elder Rot jedeent haud, un uk aus en Elder, von dan aus dee Kjoakj aunfunk en 2007. Sien deepet Velangen, Gott Siene Vision un Mission fa LW to erfellen, nämlich: Gott to leewen, Menschen to deenen un äant leiden gaunz hanjejäwde Nofolja Christi to woaren, dreef dee Kjoakj en eene oppfreschende Tiet von Waussen nenn.

2021

Toom dit Waussen mäajlich moaken, bruak LW Grunt fa en niea Aunbu aun äa jäajenwuatje Jebied, un daut jeef mea Rum fa LW Kjinja, Offizen un eene groote Stow fa dee Methalpa.

2022

LW selebrieed 15 Joaren von Deenst, met äwa 1000 Menschen tojäajen.

VONDOAG

Wan wie trigj kjikjen no 15+ Joaren von onse Jeschicht, dan es daut leicht to seenen, daut Lebenswasser äa Ziel haft kjeemol jeendat – en deepet Velangen Gott to hieren un Siene Stemm to foljen, un ne Passion Menschen äare Läwes to beenflussen, endäm daut see noda no Gott jebrocht woaren, derch een perseeneljet Veheltnis met Jesus Christus.

Vondoag komen doa äwa 1,000 Menschen jieda Wäakj toop, en onse wäakjliche Gottesdeensten un en kjliene Gruppen en onse Omjäajent. Wie loden die en, onse Famielje bietowonen un een Poat to woaren von waut Gott bie Lebenswasser deit.

bottom of page